Мектеп оқушылары арасында өтетін білім додаларының ең маңыздысы да бірегейі – пәндер олимпиадасы. Пәндер олимпиадасы – дарынды оқушылардың қабілетін шыңдауға, олардың жаңа қырынан көрінуіне жол ашатын бәсекелік білім сайысы.
Атырау облысының білімді оқушылары халықаралық, республикалық білім додаларында топ жарып, ұстаздар мен ата-ана мерейін үстем етіп келеді.
2021-2022 оқу жылында облыстың 170 оқушысы республикалық пәндер олимпиадасының бірнеше түрінен 78 медаль (16 алтын, 19 күміс, 43 қола) иеленді. Жүлдегер дарынды оқушылар облыстық дарынды мектептерде, қалалық, аудандық жалпы білім беретін мектептерде білім алады. Сонымен қатар, биылғы оқу жылында республикалық олимпиадаларда ауылдық елді-мекенде оқитын білімді оқушылар да алтын, күміс, қола медальдарға қол жеткізгенін ерекше айтқымыз келеді. «Дарын» РҒПО-ның сараптамалық талдауына сәйкес «Ең үздік олимпиадалық мектеп – 2022» атағы бойынша 1-орынмен «Білім-Инновация» лицей-интернаты, ал облыстық дарынды балаларға арналған мамандандырылған мектеп-лицей-интернаты 3-орынмен марапатталды.
Республикалық пәндер олимпиадасының қорытындысында Атырау облысының командасы үздік үштіктен көрінді. Өткен оқу жылымен салыстырғанда республикалық пәндер олимпиадасында жүлде саны 12 медальға артып отыр.
Ал халықаралық олимпиадалардың 12 түрінен еліміздің абыройын асқақтатқан облыстың 40 оқушысы қоржынға 24 медаль (1 алтын, 15 күміс, 8 қола) әкелді.
Ағымдағы жылдың шілде айында Атырау облыстық «Білім – Инновация» лицей-интернатының шәкірттері: Зауытхан Әділет Ослода өткен IMO-2022 Математикадан халықаралық олимпиадада (International Mathematical Olympiad) қола медалға, Алпамыс Ризабек Швейцарияның Цюрих қаласында өткен IРhO-2022 Халықаралық физика олимпиадасында күміс медалға қол жеткізгенін мақтанышпен айтамыз. Еске салсақ, Алпамыс Ризабек 2021 жылы да Халықаралық физика олимпиадасынан күміс медаль иеленген болатын. Аталған дарынды оқушылар Корей мемлекетіндегі UNIST (Ulsan National Institute of Science and Technology) университетіне грантқа оқуға түсті.
- ОЛИМПИАДА НӘТИЖЕСІ – КӘСІБИ ДАЙЫНДЫҚТЫҢ КӨРСЕТКІШІ
Республикалық олимпиадаға жолдама алған оқушылардың дайындығын сапалы әрі тиімді ұйымдастыруда және олардың қабілеттерін шыңдауда бірқатар жобалар ұйымдастырылып, өз нәтижесін беріп келеді.
Осы орайда жүйелі жұмысымен «Онкүндік» жобасының маңызы зор. Жоба барысында өткен оқу жылында республикаға жолдама алған жаратылыстану-математика және қоғамдық-гуманитарлық бағытындағы пәндер бойынша оқу-жаттығу жиыны аясында оқушылар облыстың білікті ұстаздарынан білімдерін шыңдады.
Сонымен қатар, 2021 жылының қыркүйек айынан бастап іске қосылған жалпы білім беретін жаратылыстану пәндері бойынша қабілетті балаларды анықтау және олимпиада резервтерін қалыптастыру мақсатында «1 оқушы – 1 пән – 1 нәтиже» жобасы да өз нәтижесін беріп келеді. Жоба аясында жаратылыстану-математика бағытындағы пәндер бойынша 7-сыныптан олимпиадаға резервтер іріктелді. Алдағы уақытта олимпиада резервтеріне арналған жазғы лагерьлер, марафондар, регаталар, командалық конкурстар ұйымдастыру жоспарлануда.
2022-2023 оқу жылында «Дарын» республикалық ғылыми-практикалық орталығының, Атырау облысы Білім беру басқармасының жоспарына сай орталық облыстың жас педагогтеріне, жастарына, оқушыларына бағытталған бірқатар іс-шараларды жоспарлады. Өткен оқу жылының аналитикалық талдауларына сүйене отырып, өткізілетін байқауларды жетілдіру, тиімді ұйымдастыру мақсатында арнайы жобалар әзірленді. Бұл жобалар оқушылар арасында олимпиадалық резерв жүйесін қалыптастыруға, дарынды оқушыларды жұртшылыққа танытуға, оларға әлеуметтік лифт жүйесі бойынша қолдау көрсетуге бағытталған. Алдағы оқу жылында да пән олимпиадасы бойынша жоғарғы нәтиже көрсетеміз деген сенімдеміз.
darynatyrau
ДАРЫНДЫ ШӘКІРТ – БІЛІКТІ ҰСТАЗДАН
«Әрбір шәкірт білімімен көрінер, Сол білімнен ұстаз биік көрінер» демекші, егеменді еліміздің жарқын болашағын жетілдіре білетін бәсекеге қабілетті жеке тұлға тәрбиелеуде, оның ішінде олимпиада жүлдегерлерін дайындауда ұстаз еңбегі зор.
Дарынды оқушының зерттеушілік қасиетін қалыптастыра отырып, ғылыми ізденушілікке баулу мақсатындағы ұстаз еңбегі білім нәрімен сусындатқан шәкіртерінің жеткен жетістігімен көрінеді.
Олипиада жүлдегерлерін оқытуда жеткен жетістігіне орай оқушыларды дайындаған ұстаздарға Білім және ғылым министрлігінің, «Дарын» РҒПО-ның, Атырау облысы Білім беру басқармасының және Таланттарды анықтау және қолдау орталығының Құрмет грамоталары, алғыс хаттары, ынталандыру сыйлықтары табыс етілді.
Өз ісінің шебері, майталман ұстаздардың жас ұрпақты оқытып, тәрбиелеуге қосқан әрбір жасампаз ісі мен еңбегі елеусіз қалмасы анық.ДАРЫНДЫ ЖАСТАР – ЕЛ БОЛАШАҒЫ
Халықаралық олимпиадалардың жеңімпаздары мен жүлдегерлерін, олардың педагогтерін марапаттап, ынталандыру оларды халықаралық деңгейде жоғары нәтижелерге қол жеткізуіне мүмкіндік береді.
Халықаралық аренада ел намысын, республикалық көлемде облысымыздың атын лайықты қорғап жүрген дарынды оқушыларымызды қолдау мақсатында қаржылай сертификаттар, ата-аналары мен пән мұғалімдеріне Оқу-ағарту министрлігінің Алғыс хаттары, «Дарын» РҒПО және Атырау облысы Білім басқармасы мен Орталық атынан Құрмет грамоталар мен Алғыс хаттар табысталды.
Қазақстан Республикасы Оқу-ағарту министрлігінің 2022 жылғы 29 шілдедегі №347 «Жалпы білім беретін пәндер бойынша халықаралық олимпиадалардың жеңімпаздары мен жүлдегерлеріне, оларды дайындаған педагогтерге біржолғы сыйақы төлеу қағидаларын, сондай ақ мөлшерлерін бекіту туралы» бұйрығына сәйкес облысымыздың «Білім-Инновация» лицейінің түлектері жоғарыда аты аталған халықаралық олимпиада жүлдегерлері ақшалай сертификатқа ие болды.
Сонымен қатар, Республикалық, халықаралық білім додаларында жүлдегер атанған 95 оқушыға 50 000-100 000 теңге аралығында ақшалай сыйақы берілді.
